អន្តរជាតិ៖ ប្រទេសជប៉ុនបានបញ្ចេញប្រតិកម្មយ៉ាងខឹងសម្បារនៅថ្ងៃអង្គារ ទី២២ ខែមីនា បន្ទាប់ពីរុស្ស៊ីបានដកខ្លួនចេញពីកិច្ចពិភាក្សាសន្ធិសញ្ញាសន្តិភាពជាមួយជប៉ុន ហើយបានបង្កកគម្រោងសេដ្ឋកិច្ចរួមគ្នាពាក់ព័ន្ធនឹងប្រជុំកោះ Kuril ដែលកំពុងមានជម្លោះ ដោយសារតែការដាក់ទណ្ឌកម្មដោយទីក្រុងតូក្យូ ជុំវិញការឈ្លានពានរបស់រុស្ស៊ីលើអ៊ុយក្រែន។

រុស្ស៊ី និងជប៉ុន នៅតែមិនទាន់បញ្ចប់សង្គ្រាមលោកលើកទី២ ជាផ្លូវការនៅឡើយ ដោយសារតែការប្រឈមមុខដាក់គ្នាលើប្រជុំកោះ ដែលស្ថិតនៅភាគខាងជើងបំផុតនៃកោះហុកកៃដូ របស់ប្រទេសជប៉ុន ដែលត្រូវបានគេស្គាល់នៅក្នុងប្រទេសរុស្ស៊ីថាជា Kurils និងនៅក្នុងប្រទេសជប៉ុនថាជាដែនដីភាគខាងជើង។ កោះទាំងនោះត្រូវបានសហភាពសូវៀតរឹបអូសនៅពេលបញ្ចប់សង្គ្រាមលោកលើកទីពីរ។

នាយករដ្ឋមន្ត្រីជប៉ុនលោក Fumio Kishida បាននិយាយថា៖ «ស្ថានភាពទាំងមូលត្រូវបានបង្កើតឡើងដោយការឈ្លានពានរបស់រុស្ស៊ីមកលើអ៊ុយក្រែន ហើយការឆ្លើយតបរបស់រុស្ស៊ីក្នុងទំនាក់ទំនងជប៉ុន-រុស្ស៊ី គឺអយុត្តិធម៌បំផុត និងមិនអាចទទួលយកបានទាំងស្រុង»។

លោកថា អាកប្បកិរិយារបស់ជប៉ុនចំពោះការស្វែងរកសន្ធិសញ្ញាសន្តិភាពគឺ មិនមានការផ្លាស់ប្តូរ ហើយជប៉ុនប្រឆាំងនឹងចំណាត់ការរបស់រុស្ស៊ី។

ប្រទេសជប៉ុនបានដាក់ទណ្ឌកម្មលើបុគ្គលចំនួន ៧៦នាក់ ធនាគារចំនួន ៧ និងស្ថាប័នចំនួន ១២ ផ្សេងទៀតនៅក្នុងប្រទេសរុស្ស៊ី ៕